அக்ரகாரக் காற்று

தூத்துக்குடி மாவட்டத்தில், எங்கள் ஊரில் அரசு உதவி பெறும் தனியார் இடைநிலைப் பள்ளி இயங்குகிறது. சமச்சீர்கல்விக் குளறுபடி உருவாக்குவதற்கு முன்பாகவே - கடமையுணர்வுள்ள இடைநிலைப்பள்ளித் தலைமையாசிரியர் சமச்சீர் கல்விப்பாட நூல்களை வாங்கிச் சேமித்து வைத்து விட்டார். பள்ளிக்கூட தனி அறையில் சமச்சீர்பாட நூல்கள் பூட்டிக் கிடக்கின்றன.

அழுகுகிற பண்டமாக இருந்தால், இத்தனை காலத்தில் நாற்றமெடுத்திருக்கும்.

"வாழைத்தார்களை மூட்டம் போட்டு பழுக்க வைப்பது போல், பாதுகாப்பாக வைத்துள்ளோம். திறப்பதற்கு அரசாங்கத்திடமிருந்து சாவி வர வேண்டும்” அரசாங்கத்திடமிருந்து மேலே போகலாம் என்று ஆணைவரவேண்டும் என்பதை அப்படிச் சொன்னர்.

ஆணை வந்துவிட்டால் மறுநாள் பிள்ளைகளுக்குப் புத்தகம் கிடைத்துவிடும்.

வேர்ப்புழுவாய் கல்வியை அரித்து வரும் சாதியக் கோளாறைப் பற்றி.

முதல் வகுப்பில் போன வருடம் சேர்ந்த பிள்ளைகள் எண்ணிக்கை 13. அது 10 ஆகக் குறைந்து விட்டது. முதலில் இந்தப் பள்ளியில் சேர்த்து விட்டு, பிறகு அருகிலுள்ள சிறு நகர மெட்ரிகுலேசன் பள்ளிகளில் இடம் கிடைத்து மூன்று பேர் குறைந்தனர். இவர்கள் ரெட்டி உயர் சாதியினர்.

இந்த ஆண்டு 14 பேர் சேர்ப்பு. ஒரே ஒரு உயர்சாதிப் பையன் தவிர்த்து மற்றவர்கள் தாழ்த்தப்பட்டவர்கள், பிற்படுத்தப்பட்டவர்கள்.

பக்கத்து சிறு நகரத்தில் சாரோன் மெட்ரிகுலேசன் பள்ளி, கவியரசர் பெண்கள் மேல்நிலைப் பள்ளி வாகனங்கள் கிராமங்களுக்குள் வந்து செல்கின்றன. களையெடுப்புக்கு காலங்காத்தாலே ஆட்களை நடத்திச் செல்வதுபோல், தங்கள் பிள்ளைகளைத் தயார்ப்படுத்தி உயர் சாதியினர் வாகனங்களில் ஏற்ற காத்திருக்கும் காட்சி - சொல்லில் அடங்காது. இந்த ஆண்டு உயர்சாதிப் பிள்ளைகள் ஆங்கிலப் பள்ளிகளில் சேர்க்கப்பட்டுள்ளனர்.

சமச்சீர் கல்வியை நீக்குவதற்கு கச்சை கட்டுகிறவர்களும் சரி, அதற்காக சண்டை போடுகிற முந்தியவர்களும் சரி - கல்வியில் படிந்து வரும் சாதி உயர்வு தாழ்வு ஆபத்தை உணர்ந்ததாய்த் தெரியவில்லை.

ஒருவகைப் பாடத்திட்டத்தைப் படிப்பவன் உயர்ந்தவன்; இன்னொரு பாடத்திட்டத்தில் படிப்பவன் தாழ்ந்தவன்; ஒரு மொழியில் படிப்பவர்கள் உயர்ந்தோர். மற்றொரு மொழியில் (தாய்மொழி) படிப்போர் தாழ்ந்தோர் - என்ற தீண்டாமை கிராம சாதிய அடுக்கில் நிலைகொள்ள ஆரம்பிக்கிறது.

புறக்கணிக்கப்பட்டவர்கள் புறக்கணிக்கப்பட்ட இடங்களுக்குப்போக வேண்டும்; உயர்ந்த இடங்கள் உயர்ந்தவர்களுக்கு மட்டுமே உரியவை என்ற கொள்கை - கல்வியிலும் விசுவரூபம் கொண்டுள்ளது. கிராமங்களுக்குப் போகும் நெடுஞ்சாலைகளிலும், கிராமங்களைச் சுற்றி வளர்ந்து வருகிற சிறு, நடுத்தர நகரங்களிலும் தொழில் நிலையங்கள், வணிக நிறுவனங்கள்பெருகியது போலவே, சமாந்தரமாக ஆங்கிலப் பள்ளிகள் பெருகிக் கொண்டு வருகின்றன. அவை கிராமப்புறங்களில் உள்ள உயர் சாதியினர், கிராமங்களில் புதிதாய் உருவாகியுள்ள நடுத்தர வர்க்கப் பிரிவினர் ஆகியோருக்கென உருவாக்கப்படுகின்றன. உலகமயமாக்கலுக்கு மட்டுமல்ல, உயர்சாதிக் கட்டுமானமும் காக்கப்படுவதை எங்கள் ஊர்ப்பள்ளி முதல் வகுப்புச் சேர்க்கை வெளிச்சம் போட்டுக் காட்டுகிறது.

அக்ரகாரம் - ஒரு அடையாளம். ஆதிக்கும் ஆதியாய், பழமைக்கும் பழமையாய் தோற்றமெடுத்த வர்ண தர்மத்தினதும், அதிகாரம் கொண்டதின் குறியீடு. இன்றைக்கு அதிகார மூளை அக்கிரகாரத்தில் என்றில்லை. உயர்வட்டத்தைத் தாண்டி, அடுத்த நிலையில் இடைநிலை வட்டத்துக்குள்ளும் நுழைந்துள்ளது. யார் அதிகாரத்தையும் சாதி வேற்றுமையையும் கொண்டிருக்கிறார்களோ அவர்கள் பார்ப்பணராகி விடுகிறார்கள். தமிழ்ச் சமூகமானாலும் பார்ப்பனரே. தமிழர்கள் தலை மேல் கால் வைத்தவர்கள் இந்த நவீன பார்ப்பனர்கள்.

சூத்திரனாக - தாழ்த்தப்பட்டவனாக இருந்தபோதும், ஒருவன் பார்ப்பன இயல்பு கொண்டவனா என்பதை தீர்மானிக்கும் அளவுகோல் ஆட்சியதிகாரம்.

வரலாற்று காலந் தொட்டு நாடாண்ட மன்னர்களாக பார்ப்பன வம்சம் நேரடியாய் இருந்ததில்லை. முடியாட்சியை நடத்திச் செல்பராக இருந்தார்கள். பிரசித்தி பெற்ற இராசராசசோழன், இராசேந்திர சோழன் ஆட்சியை இவர்களே செய்தார்கள். தனக்குள்ளே பதுங்கியிருக்கும் எரிமலையைக் மூளையை கண்டு, புறமொதுக்கும் உணத்தி அன்றைய அரசர்க்கு இல்லை போலவே தமிழர் எனச் சொல்லிக் கொண்ட இன்றைய அரசர் குலத்துக்கும் இல்லை. வேறொரு குலமாக உருத்திரியச் செய்வது ஆட்சியதிகாரத்தின் மகிமை.

பார்ப்பனர்கள் நேரடியாக ஆட்சியதிகாரத்துக்கு வருதல் இன்றைய சனநாயகத்தில் நடக்கிறது. இதுவரை, அவர்கள் வைத்தவர்கள் ஆண்டார்கள். இப்போது அவர்களே ஆளுகிறார்கள்
"நம்பூதிரிப் பிராமணனை நாயர் நெருங்கி நிற்கலாம், தொடக்கூடாது. நம்பூதிரிகளிடமிருந்து நாடார், ஈழவர் போன்றோர் 30 அடி தள்ளியும், புலையர் போன்றோர் 90 அடி தள்ளியும் நிற்க வேண்டும். நாயரிடமிருந்த நாடார், ஈழவர் போன்றோர் 12 அடி தள்ளியும், புலையர் போன்றோர் 64 அடி தள்ளியும் நிற்க வேண்டும்" (பொன்னீலன் - தெற்கிலிருந்து). சாதிகளுக்கு இடையில் தூரக் கற்கள் நிர்ணயிக்கப்பட்டிருந்தன. இன்னின்ன நேரத்தில் எதிரில் வருதல் கூடாது என்ற நேரக்கணக்குகளும் இருந்தன.

பொதுக் கல்வி, பொதுப்பள்ளி என்பவைதாம் அனைவருக்கும் கல்வி சட்டத்தினை செயலாக்கும் அடிப்படைகள். மாநில, மைய அரகளின் கையாலாகத்தானத்தால் அனைவருக்கும் கல்விச் சட்டம் (RIGHT TO EDUCATION) தேனாகப் பாய்வதற்குப் பதில் கசக்கிறது.

எல்லோருக்கும் கல்வியால் ஏற்கனவே நாம் கடைப்பிடித்து வரும் வர்க்க வேறுபாடு மண்ணாவதா? (அதுதான் தரம்) வணிகக் கொள்ளை என்னாவதுஎன்ற கேள்விகளுடன் சில தனியார் ஆங்கிலப் பள்ளிகள் எதிர்ப்புக் கொடி தூக்கினார்கள். இதைச் செயல்படுத்த மாட்டோம் என்ற சிவப்பு அறிவிப்பு செய்தது போதாதென்று மைய மாநில ஆட்சிகளுக்கு பெற்றோர்களையும் கடிதங்கள் அனுப்புமாறு செய்தார்கள். எதிர்ப்பை ஒரு மூலையில் தள்ளத் திராணியில்லாத நடுவணரசு "தனியார் பள்ளிகள் தாம் இயங்குகிற வட்டாரத்திலுள்ள ஏழைக் குழந்தைகள் பயில 25 விழுக்காடு இடம் தர வேண்டும்" என்று மறு ஆணை அனுப்பியது.

சென்னை சேத்துப்பட்டில் இருக்கிறது லேடி ஆண்டாள் மெட்ரிக் பள்ளி (Lady Andal Matriculation School), வெங்கடசுப்பராவ் மெட்ரிக் மேனிலைப் பள்ளியும், ஸ்ரீ சங்கர மேனிலைப்பள்ளியும் பெற்றோர்க்கு ஒரு சுற்றறிக்கை அனுப்பின. லேடி ஆண்டாள் மேனிலைப்பள்ளியின் தாளாளர் விஜயலட்சுமி சீனிவாசன் 28 ஏப்ரல் 2011 அன்று அரசுக்கு அனுப்பிய அறிக்கை இது. "அனைவருக்கும் கல்வி வழங்கும் பொறுப்பைஅரசு எமது தலையில் சுமத்தக்கூடாது. எங்கள் மாணவர் பெறும் கல்வித்தரம், அறிவு, கட்டிட, ஆராய்ச்சிக்கூட வசதிகள் முதலானைவைகளை அருகாமையில் வாழும் ஏழைக் குழந்தைகளும் பெற வேண்டுமென அரசு எதிர்பார்த்தால் அவர்களுக்காக தனி ஷிப்டுகளை நாங்கள் நடத்திட அனுமதிக்கவேண்டும். அவர்களை ஒரே வகுப்பில் உட்கார அனுமதிப்பது சரியல்ல"

பள்ளியில் பயில்கிற மாணவர்களின் பெற்றோரையும் அரசுக்கு எதிர்ப்பைக் காட்டுமாறு தூண்டினார்கள். தமது குழந்தைகளுடன் தெருக் குழந்தைகள் கலக்க அனுமதிக்காதீர்கள் என வாய்மொழியாக உதிர்த்தார்கள்.

ஒரு நூற்றாண்டுக்கு முன்பு கேரளாவிலும் தமிழகத்திலும் செயல்படுத்தப்பட்ட தீண்டாமையை நவீன வடிவத்தில் எடுத்துவர முயற்சிசெய்கிறார்கள்.

பிரமாணன், உயர்சாதி, வெள்ளாளர், முதலியார், ரெட்டிமார் ஆகியோருக்கு இத்தனை அடிதூரத்தில் மனிதன் நிற்க வேண்டுமென்ற தீண்டாமைமுறை ஒரே வகுப்பில், ஒரே நேரத்தில் கற்க அனுமதியோம் என்பதாக மாறுகிறது ஸ்ரீ சங்கர மேல்நிலைப் பள்ளியின் லேடி ஆண்டாள் மேல்நிலைப் பள்ளியின் நிர்வாகிகளான இவர்கள் சுத்த பார்ப்பனர்கள்.

ஏப்ரல் 2011ல் தி.மு.க அரசுதான் அதிகாரத்திலிருந்தது. தேர்தல் முடிவுகளுக்கு காத்திருந்தார்கள். முந்திய அரசும், இப்போதைய அ.தி.மு.க அரசும் கல்வித் தீண்டாமை பற்றி ஒரு முணுமுணுப்பும் காட்டவில்லை.

அனைவருக்கும் கல்வி என அரசியல் சட்டம் வலியுறுத்தும் மாண்பை குழி தோண்டி மண் போட்டு மூடுவார்கள் இந்த பார்ப்பன நிர்வாகிகள். ஆட்சிக்கு வருகிற சூத்திரனாக இருந்தால் அவனும் இரண்டு கை மண் அள்ளிப் போடுவான். மாறி மாறி வந்த திராவிட பாரம்பரியங்கள் இதையே செய்தார்கள்.

"கல்வி என்பது வாழ்வதற்கான கல்வி, இணைந்து வாழ்வதற்கான கல்வி" என்று யுனெஸ்கோ வரையறுத்ததை "கல்வி எல்லோரும் வாழ்வதற்கானதாகவும் கூடாது. இணைவதற்காகவும் கூடாது" என்று தீண்டாமையை வெளிப்படையாக அறிவிப்புச் செய்துள்ளார்கள். இந்தக் குழுவின் சாதிய மனோபாவமும் வர்க்க இயல்பும் ஜெயலலிதாவிடம் ததும்பி அலையடிக்கிறது. தீண்டாமைக் கோட்பாட்டின் அசிங்கமான பிரகடனம் லேடி ஆண்டாள் என்றால் அதன் அப்பட்டமான முழக்கமே ஜெயலலிதாவின் உச்சநீதிமன்றப் படையெடுப்புகள்.

கல்வி நிலையம் என்பது, பிஞ்சுகள், சாதி, நிற, இன, வர்க்க வேறுபாடின்றி கலக்கும் அரங்கம். கற்பதில் ஒருவருக்கு ஒருவர் வழங்கவும் ஒருவருக்கொருவர் எடுத்துக் கொள்ளவும் வாய்ப்பான இடம். ஒவ்வொரு வர்க்கத்தில் - ஒவ்வொரு சாதியில் வட்டாரங்களிலிருந்தும் வரும் குழந்தைகள் மற்றவர்களைப் பற்றி அறியவும் பழகவும் மனம் ஒன்றவும் தடையகற்றி ஒரு குடும்பத்துக்குள் உள்ள இணைப்பை சமூக இணைப்பாக கல்வித்தறி நெய்து தரும்.

ஒவ்வொருவருள்ளும் இயங்கும் தனிநபர் சிந்தனைகளைச் சுத்தகரிப்பு செய்து சமமான கல்வி, சமமான வாய்ப்பு, சமதர்ம சிந்தனை போன்றவைகளை வழங்கும் நீரேற்று நிலையங்களாக விளங்கவேண்டியவை கல்விச் சாலைகள் சாதிய ரீதியாக, வர்க்க ரீதியாக வேறுபாட்டைத் தக்க வைக்க எண்ணுகிறவர்கள் - இந்த மனக் கலப்பின் இணைப்பை விரும்புவதில்லை. பிரித்து வைப்பதை உளவியல்காரணம் காட்டி ஆதரிக்கிறார்கள்.

"ஏழ்மை நிலையில் இருக்கும் குழந்தைகள் ஒரே பள்ளியில் ஒரே வகுப்பில் படிக்கும்போது பணக்காரப் பிள்ளைகளோடு தம்மை ஒப்பிட்டுப் பார்த்து தாழ்மையாக உணருவார்கள். அவனுடைய மதிய உணவு, பயன்படுத்தும் உபகரணங்கள், உடை, அணியும் காலணி எல்லாவற்றையும் ஒப்பிட்டு நோக்குவான். படிப்பில் கவனம் கலையும். இந்தக் கல்வி அவனுக்கு அந்நியப்பட்டுப் போகும். அவனது பெற்றோர்களும் இந்த சிந்தனைக்குத் தள்ளப்படுவர்"

வாழ்நிலையே எண்ணங்களை உருவாக்குகிறது என்ற அறிவியல் இங்கும் உண்மையாகி விடுகிறது

3

மக்கள் நலனை மட்டுமே முன்னிறுத்தி அரசியல் செய்வது என்று சிந்தப்பவர்களுக்கு எதிரிகள் அதிகம் இருப்பதில்லை. எதிர்ச் திசையில் ஜெயலலிதா சிந்திப்பதால் (சாதிய, வர்க்க சிந்தனை) மக்களின் எதிரிகளை நிபுணர் குழுவில் இணைத்தார். அவருக்குப் பின்னணியில் சோ போன்ற மக்கள் எதிரிகள் ஆலோசனை வழங்குகிறவர்களாய் நீடிக்கிறார்கள்.

இதற்கு முந்தைய தி.மு.க ஆட்சியாளர்கள் இதே அரசியலில் இயங்கினாலும் ஜெயலலிதா போலவே கருணாநிதியும் தன் புகழ்பாடும் மேதைகளின் கூட்டத்தை - குறிப்பாக தமிழறிஞர் எனப்படுவோர் குழுவைக் கொண்டிருந்தார்.

இவர்கள் அளித்த கல்வியால் யாரை இவர்கள் முன்னேற்றினார்கள்? முந்தியவர்கள் அறிவித்த தர வரிசைப் பட்டியல் போலவே, இன்றைய மக்கள் நல்வாழ்வுத்துறை அமைச்சர் டாக்டர் வி.எல்.விஜய் வெளியிடுகிறார்.

எம்.பி.பி.எஸ் தர வரிசைப்பட்டியலில் முதல் 10 இடங்களில் 200க்கு 200 மதிப்பெண் பெற்று இடம் பெற்ற மாணவர்கள், அவர்களது பள்ளிகள்.
  1. க.சிவரஞ்சனி - வித்யா மந்திர் மெட்ரிகுலேஷன் ராசிபுரம்
  2. எல்.எஸ்.தக்ஷிணி - கிரின்பார்க் மெட்ரிகுலேசன் பள்ளி, நாமக்கல்
  3. ஸ்ருதி கணேஷ் டி.ஏ.வி மெட்ரிகுலேசன் பள்ளி, கோபாலபுரம், சென்னை
  4. மோ சுரேஷ்பால்ராஜ் - ஹோலி பேமிலி காண்வென்ட் கீழ்க்கட்டளை, சென்னை
  5. ஆ ஹரிநிவாஸ் - ஏ.கே.டி மேல்நிலைப்பள்ளி, கள்ளக்குறிச்சி
  6. ம.ஜே.துனணீபாசௌந்தர்யா, எஸ்.பி.ஓ.ஏ அண்ணாநகர், சென்னை
  7. பு.அகிலா - ஆதர்ஷ் வித்யாலய மெட்ரிகுலேசன் பள்ளி, அந்தியூர்
  8. இரா மணிகண்டன் - ஏ.கே.டி.மேநிலைப்பள்ளி, கள்ளக்குறிச்சி
  9. ச.சிவசக்திவேல் - எஸ்.ஆர்.வி.மேநிலைப்பள்ளி, ராசிபுரம்
  10. அருண்குமார் - ஏ.கே.டி மேநிலைப்பள்ளி, கள்ளக்குறிச்சி
இவர்களைப் போல் மேலும் 56 மாணவர்கள் 200க்கு 200பெற்று தரவரிசைப் பட்டியலில் இடம் பெற்றுள்ளனர். இவர்களும், இதேபோன்று தர வரிசை கொண்டவர்களும் தமிழகத்தின் 17 அரசு மருத்துவக் கல்லூரிகள் உள்ள 1653 இடங்கள் பல் மருத்துவக் கல்லூரியிலுள்ள 85 இடங்களில் சேர்வதற்கான மாணவர்கள் எல்லோரும் ஆங்கில வழிப்பள்ளிகளில் பயின்றவர்கள். முதல் பத்திலுள்ள பெயர்களைப் பார்த்தால் புரியும் - உயர்சாதி, உயர் வர்க்கப்பிரிவைச் சேர்ந்தவர்கள் என்பதாகும்.

எங்கள் ஊர்ப்பள்ளியில் முதல் வகுப்பில் சேர்ந்த பிள்ளைகளில் மதுநிஷா, பானுப்பிரியா, மதுபாலா ஆகிய பெயர்கள் சற்று வித்தியாசமானவை. கரும்பன், இடும்பன், பச்சை என்று பழைய பெயர்களின் அடையாளத்தை தவிர்த்து, மேன் மக்கள் திரளில் இணைந்து கொள்வதற்கான பரிதவிப்பில் உண்டானவை. இந்த மண்ணே கேவலமாகத் தெரிவதால் மண்ணின் பெயர்களைத் தவிர்ப்பதை பெருமையாகக் கருதினர். பெயரளவிலாவது மேல்நிலையாக்கம் பெற முண்டும் இயல்பு இதில் வெளிப்படுகிறது.

அரசு மருத்துவக் கல்லூரிகள் பொறியியல் தொழிற் படிப்புகளில் முழு இடங்களையும் அபகரித்துக் கொள்கிறவர்கள் முழுக்க முழுக்க +2 வரை மெட்ரிக் பாடத்திட்டத்தில் பயில்கிறவர்கள் அல்ல; பத்தாம் வகுப்பு வரை மெட்ரிக் பாடத்திட்டம். அதன்பின் மாநிலப் பாடத்திட்டத்துக்கு மாறியவர்கள். மான ரோஷம் உள்ளவர்களாக இருந்தால் மெட்ரிக் முறையிலேயே +2 தேர்வை எழுத வேண்டாமா என எவரும் கேட்க முடியாது. பத்தாம் வகுப்புக்குப் பின் மாநிலக் கல்வி முறைக்கு ஒரே தவாய்த் தாவி - இடைவழியில் எல்லாவற்றையும் பறித்துச் செல்கிற வழிப்பறிக் கொள்ளையர்களே. வழிப்பறி செய்கிற இவர்களை வாழ்த்தி தர வரிசைப் பட்டியலை வழங்குகிறார் நமது மருத்துவத்துறை அமைச்சரும், கல்வி அமைச்சர்களும். கொள்ளையர்கள் கொள்ளையர்களுக்கு துணை நிற்பார்கள். இந்த உலக உண்மையை முந்தைய ஆட்சியாளர்களும் உணர்ந்து செயல்படுத்தினார்கள். சமச்சீர்கல்வி ஆங்கிலத்தில் இருக்கலாம் என்று அதற்கும் வழிசெய்து போயிருக்கிறது தி.மு.க அரசு.

எதற்குள்ளும் எப்படி வேண்டுமானாலும் நுழைந்து கொள்கிற திறமை கொண்டவர் கருணாநிதி. பாடநூற்களின் பின் அட்டையில் உலகத்தமிழ்ச் செம்மொழி மாநாடு கோவை என்ற படம். அந்த வட்டத்துக்குள் திருவள்ளுவர். அதுவும் கருணாநிதி நிறுவிய கன்னியாகுமரித் திருவள்ளுவர். கருணாநிதி கூடாது என்றால் திருவள்ளுவரும் கூடாதுதானே. திருவள்ளுவர் சிலைக்குக் கீழே பிறப்பொக்கும் எல்லா உயிர்க்கும் என்ற குறள் வரி. அது கருணாநிதி கையெழுத்தில்! அக்கிரகார நெஞ்சம் வஞ்சம் கொள்ள அது ஒன்று போதாதா? மொத்தமாய் பின் அட்டையை ஒட்டி மூடினார்கள். பிறப்பொக்கும் எல்லா உயிர்க்கும் என்ற வரியை வெற்றாய்ச் சொல்வதன் மூலமோ எழுதுவதன் மூலமோ எல்லோருக்கம் மேலாய் தன் உயர்வை முன்வைக்கும் கருணாநிதியை நினைத்து அழுவதா சிரிப்பதா எனத் தெரியவில்லை.

கருணாநிதியின் இந்தத் திறமையைக்கூட ஆளுமை என்று பேர் சொல்ல அறிஞர் குழாம் இருக்கிறது. மனோன்மணியம் சுந்தரனார் எழுதிய தமிழ்த்தாய் வாழ்த்துப் பாடலில் "ஆரியம்போல் உலகவழக்கொழிந்து சிதையா நின் சீரிளமைத் திறம் வியந்து வாழ்த்துமே" என்ற உண்மை உரைக்கும் வாசகத்தை உருவி எடுத்த கருணாநிதியின் அச்சத்தையும் ஆளுமை என்று போற்றுவார்கள் இவர்கள்.

கருணாநிதியைக் காட்டி அல்லது அவர் தயாரித்த பாடநூலைக் காட்டி சமச்சீர் கல்வியை ஒழிப்பது அல்ல ஜெயலலிதாவின் மூல நோக்கம். உயர்நீதிமன்றம் விட்டால் உச்ச நீதிமன்றம் என்று மறுபடி மறுபடி ஓடச்செய்வதற்கு உயர்சாதிக் கொளுப்பும், ஆங்கில உயர்வர்க்கத் திமிருமே மூலகாரணிகள். நடுவணரசில் இருக்கிற பிராமணர்கள் முதல் உச்ச நீதி மன்றப் பிராமணியம் வரை தனது முயற்சியை காப்பாற்றி விடாதா என்ற நம்பிக்கை மக்களுக்கு எதிராய் ஓடச்செய்கிறது.

கருத்துகள்

பிரபலமான பதிவுகள்

பா.செயப்பிரகாசம் நூல்கள்

நூல்நோக்கு: கி.ரா.வின் கடைசி ஆண்டுகள்

ஜெயந்தன் - நினைக்கப்படும்

கதைசொல்லி - 32 வது இதழ் குறித்த பார்வை

நா.காமராசன் ஓய்ந்த நதியலை